"Դեռ երբեք չէր եղել այնպես, որ միանգամից այսքան աղջիկների հետ հանդիպեմ: Նույնիսկ մի փոքր վախենում եմ, որովհետեւ տղաների հետ կարող եմ լեզու գտնել, բայց աղջիկների հետ մի քիչ դժվար է",- կատակելով ասաց IBF վարկածով աշխարհի չեմպիոն, արքա Արթուր Աբրահամը, որը  երեկ հանդիպման էր Վալերի Բրյուսովի անվան լեզվաբանական համալսարանի ուսանողների հետ: Նա 31 մենամարտ է ունեցել՝ բոլորն էլ հաղթանակով է ավարտել:
Հանդիպման համար տրամադրել էին մոտ 200 հոգանոց դահլիճ, որը շատ փոքր էր բոլոր ցանկացողներին տեղավորելու համար, եւ ուսանողների միայն 10 տոկոսը կարողացավ ներս մտնել: Որոշ մասը ոտքի վրա էր մնացել, իսկ հավատարիմ երկրպագուների մի ոչ ստվար զանգված էլ դրսում վանկարկում էր՝ "Արթուր", քանի որ ներս մտնելու հնարավորություն չունեին: Ռեկտոր Սուրեն Զոլյանն ասաց, որ եթե իմանային այսքան մարդ կգար, հանդիպումը դրսում կկազմակերպեին:   
"Առավոտյան 20-25 ուսանող Արթուրին սպասում էր "Շանթ" հեռուստաընկերության մուտքի մոտ՝ լուսանկարվելու ու ինքնագիր վերցնելու համար: Եկել ենք, որովհետեւ չգիտենք՝ կկարողանա՞նք արդյոք ներս մտնել հանդիպման ժամանակ, թե՞ ոչ",- պատմեց սպորտային մեկնաբան Վարդան Թադեւոսյանը:
Բռնցքամարտի արքա Արթուր Աբրահամն իրեն արքա չի համարում. "Ես սովորական մարդ եմ: Ինձ պահում եմ սովորական մարդու նման": Նա նաեւ պատասխանեց ուսանողների հարցերին: Ասաց, որ մենամարտերից առաջ եւ հետո միշտ մայրիկին է զանգում՝ հանգստացնում նրան: "Երբ հաղթում եմ, հանգստանում եմ: Կարծես 100 կիլո բեռ ընկնի ուսերիցս: Մենամարտերի ժամանակ միայն մարզչիս ու եղբորս ձայնն եմ լսում: Կարծում եմ, որ ամենադժվար բանն է, երբ եղբայրը կռվում է, իսկ մյուսը ոչինչ չի կարող անել":
Արթուրն օգնության կարգով մի քանի մենամարտ է մեկնաբանել Գերմանիայի հեռուստաընկերություններից մեկով, բայց կզբաղվի՞ արդյոք այդ աշխատանքով բռնցքամարտից հեռանալուց հետո եւ ի՞նչ մասնագիտություն կընտրեր, եթե բռնցքամարտիկ չլիներ՝ պատասխանեց. "Ես չեմ պատրաստվում մեկնաբանությամբ զբաղվել: Եթե այս մասնագիտությունը չունենայի՝ Բրյուսովում կդասավանդեի": Ապա ժպտալով ավելացրեց. "Երեւի մյուս դասախոսներն ինձ չսիրեին":
Հայաստանում Արթուրը չի մարզվում՝ պայմաններ չկան: "Սովորաբար ես մարզվում եմ 3-4 ամիս, ապա 3 շաբաթ հանգստանում եմ՝ ուտում հաց, պանիր, կանաչի ու խորոված: Յուրաքանչյուր օրգանիզմ հանգստի կարիք ունի":
Աբրահամը հանդես է գալու "Super six" մրցամարտերին, որոնց մասնակցելու են աշխարհի 6 լավագույն բռնցքամարտիկներ: "Մենամարտերը կավարտվեն  2011թ.-ին: Մասնակցելու համար փոխել ենք քաշային կարգս՝ ավելացնելով 1 կիլոգրամ: Հունվարի 23-ին ես մենամարտելու եմ Անդրե Դիրելի հետ:  Ես նպատակադրվել եմ Հայաստանում մի մենամարտ կազմակերպել, որի ժամանակ հանդես եմ գալու մեր դրոշի ներքո":